Ромелу Лукаку побарал од директорите на миланскиот клуб да го вратат во црно-синиот дрес за што е подготвен дури и на драстично намалување на платата.
Вака известува италијанскиот спортски дневен весник Tuttosport. Според весникот, Лукаку постојано праќал пораки до Пјеро Аузилио и Бепе Марота молејќи ги да се погрижат летово да се врати во Милано. Воедно, белгискиот напаѓач и на социјалните мрежи често споделува линкови и слики од Интер и друштвените активности на неговите поранешни соиграчи. Последен таков негов „испад“ беше со скарата која ја организираа „Нераѕурите“ во Пинетина.
Бордот директори на Интер, како и претседателот Стивен Чан, се свесни дека Лукаку сака да се врати и дека е подготвен на намалување на платата за речиси 50% само за повторно да го облече дресот на миланскиот гигант. Сепак, желбите се едно, а реалноста друго. Челси летоска плати баснословна сума за неговите услуги, кои не ги оправда, па сега невозможно е да се очекува лондонскиот клуб да го врати за помала сума само за да му излезе во пресрет, особено не откако голгетерот неколку пати јавно си играше со реномето на „Сините“, иако ненамерно.
Лукаку не е во добри односи со тренерот Томас Тухел, но дури и Германецот да си замине од клубот тешко е за очекување „Сините“ на лето да го продадат засилувањето за кое искешираа 113 милиони евра, и тоа по само една година.
Едно можно решение е позајмица при која Челси не би се согласил да му плаќа на Лукаку ни фунта од платата. Тука стапува на сцена жртвата која Белгиецот е подготвен да ја направи, односно да се откаже од речиси половина плата. Сепак, и по завршувањето на позајмицата двата клуба повторно би се вратиле на самиот почеток бидејќи Челси би го продал Лукаку каде било само за да врати поголем дел од потрошените пари, пари кои Интер ги нема за да ги плати и реално не би ни сакал да ги потроши на Лукаку дури и да би ги имал.
