Белгискиот колос си ја спаси кариерата со доаѓањето во Интер, а токму на тренерот Антонио Конте му е најблагодарен и за него би сторил буквално сѐ.
Летото 2019 година Ромелу Лукаку го напушти Манчестер Јунајтед по само двегодишен престој и пристигна во Интер на барање на Антонио Конте. Просечните игри во црвениот дрес Белгиецот веднаш ги остави зад себе етаблирајќи се како расен голгетер во Серија А.
„За Конте би се борел до смрт. Не можев да му се придружам во Челси, но секогаш велев дека ќе играм за него кога ќе го напуштам Манчестер Јунајтед“, вели Лукаку за La Tribune.
Во Интер Лукаку веднаш покажа друго лице од она под кое стана препознатлив во Манчестер. Открива дека за тоа е заслуже еден совет од италијанскиот стратег.
„Конте многу отворено ми кажа: 'Доколку не работиш на тренинзите - нема да играш. Есенцијално е да знаеш како да играш и кога си завртен со грб кон голот'. Многу е важно да запознаете луѓе кои ќе ви ја говорат апсолутната вистина за да ви помогнат да се подобрите“, додаде напаѓачот со потекло од Конго ДР.
Викендов Интер стана шампион на Серија А, а за Лукаку ова е само втор трофеј во кариерата откако пред 11 години стана шампион на Белгија со Андерлехт.
„Помислив дека ќе биде или сега или никогаш. Во кариерата можете да постигнете и 500 голови, но доколку на крајот не победите бадијала ви е сѐ. Ланската сезона беше исто така добра, но оваа е најдобрата во мојата кариера. Преубаво е и се надевам дека вака ќе продолжиме. Сакам на сите да им се заблагодарам, навистина сум пресреќен“, заврши тој.