Белорускиот претседател Александар Лукашенко изјави во вторникот дека од него било побарано да склучи пакт за ненапаѓање со Украина, објави државната новинска агенција Belta, пренесува Reuters.
Александар Лукашенко, близок соработник на рускиот претседател Владимир Путин, ја обелодени наводната понуда на состанокот со владините претставници и безбедносните сили, каде што исто така ја обвини Украина дека му дозволува на Западот да ја користи нејзината територија за обука и вооружување милитанти кои би можеле да ја дестабилизираат ситуацијата во Белорусија.
„Бараат од нас да не влегуваме во војна со Украина под никакви услови, да не ги преместуваме нашите војници таму. Предлагаат да склучиме пакт за ненапаѓање“, рече Лукашенко, пренесе Belta.
Од неговата изјава не е јасно дали Украина или Западот ја дале наводната понуда, пишува Reuters.
Киев не ги коментираше наводите на Лукашенко, а претходно украинските власти предупредија дека Русија може повторно да започне офанзива на северот на Украина од Белорусија.
Кремљ одби „засега“ да коментира дали Лукашенко ќе разговара со Путин за наводната понуда.
Минск ѝ дозволи на руската војска да ја искористи белоруската територија за да изврши инвазија на Украина на 24 февруари минатата година.
Меѓутоа, белоруските војници засега не учествуваат во војната, но се интензивира заедничката воена обука на белоруските војници со руските сили стационирани во Белорусија.
Лукашенко, исто така, ја обвини Украина во вторникот дека засолнила милитанти на нејзина територија кои би можеле да учествуваат во наводниот долгорочен план на Западот за дестабилизација на Белорусија.
„Не знам што им требаше тоа на Украинците“, рече Лукашенко. Тој додаде дека белоруските сили ќе одговорат силно на секоја закана за ред во земјата.
