Мадона најави враќање на музичката сцена, а на својот Instagram профил сподели како изгледаат нејзините подготовки во студио за новите музички изведби на кои работи.
Нејзините обожаватели ги чекаат новите музички изведби на Мадона од 2019 година. Во објава на Instagram таа напиша дека со Стјуарт Прајс работела на нови песни во изминатите месеци.
„Изминатите месеци беа лек за мојата душа. Не морам да барам дозвола од никого да пишувам песни и да создавам своја музика. Навистина сум возбудена што можам да го споделам тоа со вас. Кој сака да ја слушне мојата нова музика во 2025 година?“, напиша Мадона во описот на својата објава.
Официјалното пристигнување на новите песни на Мадона ги воодушеви нејзините обожаватели, кои во коментарите напишаа дека едвај чекаат „хит по хит“ што таа ги подготвува и дека оваа вест е еден од најубавите подароци за новогодишните празници.
Потсетуваме, пејачката неодамна на своите сториња на Instagram сподели фотографии генерирани од вештачка интелигенција, на кои е претставена како во прегратка позира со папата Франциско.
На една од фотографиите што ги постави се гледа како папата ја гушка, а со описот напишала: „Вака изгледа почетокот на викендот“. Нејзините обожаватели ги сфатија најавите како уште една во низата провокации и прозивки на Католичката црква, со која Мадона е во конфликт повеќе од 30 години.
