Ситуацијата во Каталонија би можела да достигне точка на вриење. Шпанската влада се очекува да ги објави конкретните мерки за преземање на контролата над Каталонија, што ќе биде прв пат во историјата на Шпанија, централната влада да се повика на Уставот, за да ја реформира регионалната влада и повика нови избори.
Европската унија го поддржува Мадрид и нема да посредува во каталонската криза.
Шпанскиот премиер, Маријано Рахој, ќе одржи вонреден состанок на својот кабинет и ќе ги соопшти мерките за суспендирање на автономијата на Каталонија. За конкретните акции кои планира да ги преземе по членот 155, мора да го извести Сенатот, во кој, пред конечното гласање, ќе се одржи дебата.
Рахој има поддршка од водечките опозициски партии во Шпанија. Постигнаа договор во јануари да одржат предвремени парламентарни избори во Каталонија. Според аналитичарите, Рахој може да воведе вонредна состојба и забрана за движење и собирања во Каталонија, да прогласи криза на националната безбедност и да донесе закони со декрет. И шпанскиот крал, Фелипе Шести, кој ретко зборува за политика, нагласи дека се противи на независноста на Каталонија.
Каталонските претставници за денеска најавија масовни протести.
