Во град каде што секој квадратен метар вреди злато, луѓето пронајдоа начин да живеат во простор кој на прв поглед изгледа речиси нереален.
Хонгконг, познат по своите облакодери и неонски светла, крие и архитектонско чудо кое е истовремено фасцинантно и застрашувачко. Во квартот Квори Беј, постои станбен комплекс кој мештаните со љубов, но и со доза на иронија, го нарекуваат „Чудовиштето“.
Не станува збор за една зграда, туку за пет меѓусебно поврзани блокови во кои живеат околу 10.000 луѓе. Целиот комплекс вклучува повеќе од 2.000 станови, а сцените наликуваат на сцени од футуристички филмови.
Иако Хонгконг со години е на листата на најскапи градови во светот, релативно прифатливо сместување може да се најде токму тука. Владата го изгради овој комплекс во 1960-тите години со цел да обезбеди станови за семејства и поединци со скромни приходи. Така се создадоа мали, функционални станови, каде што животот се одвива на само неколку квадратни метри.
На социјалните мрежи и YouTube каналите можете да најдете многу приказни за луѓе кои решиле да му го покажат на светот својот живот во „Чудовиштето“. Меѓу нив е и Ешли Ким, која поминала неколку месеци во стан од само девет квадратни метри. Иако звучи невозможно, таа го претворила тој мал простор во дом со кревет, работен агол, мини-кујна и остава.
Цената на ваквите станови започнува од неколку стотици евра месечно, што е вистинска реткост во споредба со просечните цени во Хонгконг. За многу жители, ова не е само практично решение, туку и начин да останат во градот кој никогаш не спие, без оглед на високите трошоци за живот.
Во „Чудовиштето“, секојдневно се испреплетуваат илјадници приказни, од семејства кои живеат таму со децении, до млади професионалци кои го бараат своето место во еден од најдинамичните градови во светот. Погледнете како изгледаат станови од само 9 квадратни метри:
