Вековна мистерија конечно е решена - точната локација на единствениот дом на Вилијам Шекспир во Лондон. Откритието фрла нова светлина врз неговите последни години и го поставува прашањето дали тука се напишани завршетоците на неговите најпознати драми.
Новооткриена мапа од XVII век даде важни сознанија за животот на Вилијам Шекспир во Лондон.
Обожавателите на познатиот писател веќе знаат дека тој потекнува од Стратфорд на Ејвон, но својата кариера ја изградил во Лондон, каде што денес се зачувани многу малку траги од неговиот живот.
Сега, мапа од XVII век помогна за прв пат да се одреди точната локација на единствената куќа што Шекспир некогаш ја купил во Лондон, местото каде што веројатно работел на своите последни драми.
Локацијата и големината на имотот ги идентификувала професорката Луси Мунро од колеџот „Кингс“ во Лондон, која случајно дошла до откритието додека истражувала други материјали во лондонските архиви.
Откриени се три документи, два од Лондонскиот архив и еден од Националниот архив, што овозможи подетално разбирање на овој имот.
Претходно беше познато дека Шекспир поседувал куќа во делот од Лондон познат како Блекфрајарс, поранешен доминикански манастир од XIII век, но се претпоставуваше дека се наоѓала во близина на портата.
Новото откритие сега ја открива нејзината точна локација, големина и распоред; куќата не била голема и имала тлоцрт во облик на буквата „L“.
Се наоѓала на местото на денешниот источен дел од улиоцата „Ајрланд Јард“, долниот дел од улицата „Бургон“ и делови од згради на улицата „Бургон“ и ридот Сент Ендрус.
Ова значи дека плочата посветена на Шекспир на ридот Сент Ендрус всушност не означува место „во близина“, туку точното место каде што некогаш се наоѓала неговата куќа.
Два дополнителни документи се однесуваат на продажбата на овој имот во 1665 година од страна на внуката на Шекспир.
Сè уште не е сосема јасно дали Шекспир всушност живеел во куќата или ја издавал, но според професорката Манро, нејзината големина и близината до театарот „Блекфрајарс“, на само пет минути пешачење, укажуваат дека во подоцнежните години веројатно поминал повеќе време во Лондон отколку што претходно се мислеше.
Можно е тука да работел на своите последни дела, како што се драмите „Хенри VIII“ и „Двајца благородни братучеди“, кои ги напишал заедно со Џон Флечер.
Благодарение на приходите од своите драми, Шекспир изградил семеен дом во Стратфорд, кој повеќе не постои. Починал таму во 1616 година, на 52-годишна возраст.
