Париз брзо добива репутација како европски центар на урбаното пчеларство. Денес, на покривите на познати згради, хотели, ресторани, но и во приватни дворови и канцеларии има повеќе од две илјади кошници за пчели.
Градските пчели се покажаа како поотпорни и попродуктивни од оние во селата, а нивниот мед се користи за потребите на рестораните, хотелите и домаќинствата.
Меѓу локациите каде што се скриени кошници се катедралата Нотр Дам, Гран Пале, Операта Гарнје, Операта Бастија и Музејот Орсеј.
Особено е интересно што околу 200.000 пчели од покривот на Нотр Дам го преживеаа катастрофалниот пожар во 2019 година.
Некои познати ресторани и хотели, како што се „Tour d’Argent“ или „The Westin“, произведуваат сопствен мед кој станува дел од нивното мени.
Овој тренд сè повеќе го привлекува вниманието на граѓаните, па затоа е можно да се посетуваат и курсеви за пчеларство во рамките на Централното друштво на пчелари, основано во 1856 година.
Парискиот мед се смета за еден од најдобрите примери за одржливост во урбани услови, пчелите не ги вознемируваат минувачите, а производството на мед е органско, без употреба на пестициди.
Пчелите и другите опрашувачи се клучни за три четвртини од растенијата што сочинуваат дури 90% од светската храна, што дополнително ја истакнува важноста на урбаното пчеларство како одговор на глобалната криза со опрашувачи.
