Иако вежбањето има толку многу придобивки за нашето здравје, не е секогаш лесно да се најде мотивација да се оди во теретана, да се трча или да се испешачат 10.000 чекори. Сепак, усвојување на навиката за следење на вашата активност и практикување вежби за свесност помага во мотивирањето.
Нова студија за мотивацијата за вежбање може да има решение за оние на кои им е тешко да се придржуваат до рутина, откако откри дека учесниците биле попосветени на вежбањето откако ги следеле своите чекори преку апликации и вклучиле вежби за свесност.
Придобивките од користењето на фитнес тракери (апликации што го следат вашиот напредок) се добро документирани, но ова истражување е првото што ја испитува комбинираната улога на дигиталната интервенција и тренинг за свесност врз промената на однесувањето.
Сите учесници во студијата, предводена од Универзитетот во Бат, биле возрасни кои не ги исполнувале препорачаните нивоа на активност. Тоа се 150 минути вежбање со умерен интензитет или 75 минути вежбање со енергичен интензитет, според NHS.
Од учесниците во студијата било побарано да се стремат кон 8.000 чекори дневно користејќи основен мерач на чекори во текот на 30 дена. Половина од нив биле замолени да следат рутина преку друга апликација, која вклучувала кратки вежби фокусирани на свесност за телото, движење и вежбање.
Генерално, половина од испитаниците кои ги следеле своите чекори и се вклучувале во вежби за свесност имале повисоко ниво на активност од оние кои само ги следеле своите чекори, и тоа за 76 минути.
Сепак, обете групи почнале да вежбаат повеќе, па затоа е докажано дека дури и самото броење чекори ја зголемува мотивацијата за вежбање.
Учесниците кои ги следеле своите чекори и следеле вежби за свесност пријавиле значително „посилна“ намера да продолжат со својата рутина на вежбање.
„Дури и краткорочната обука за внимателност во комбинација со следење на чекорите може да ги охрабри луѓето да се движат повеќе, што би можело да има трајни придобивки“, вели д-р Маша Ремскар, главен истражувач од Одделот за психологија на Универзитетот во Бат.
Додаде дека помагањето на луѓето да го изградат тој внатрешен нагон за вежбање е клучно - особено во време кога многу луѓе се борат да останат активни.
