Доколку сте се разбудиле со болки во мускулите по интензивен тренинг, веројатно имате одложена појава на болка во мускулите, како резултат на мало оштетување на мускулното ткиво и воспаление.
За среќа, болката е привремена и знак дека вашите мускули се опоравуваат. За да ви помогне побрзо да ја ублажите болката, диететичарката Роксана Ехсани сподели со порталот Eating Well неколку едноставни чекори што можете да ги преземете за да се чувствувате подобро.
Не останувајте сосема мирни
Иако е примамливо да се остане на каучот, лесната активност ја стимулира циркулацијата и го забрзува закрепнувањето. Одењето, пливањето, возењето велосипед или јогата можат да помогнат, како и лесни чучњеви, склекови...
Искористете ја топлината
Топлината може да ја намали болката и да го забрза закрепнувањето. Топла бања, шише со топла вода или сауна се одлични сојузници против вкочанетост и болки во мускулите, објавува Eating Well.
Додадете флавоноиди во вашата исхрана
Природните соединенија од бобинки, домати, брокула, кафе и чај помагаат во борбата против воспалението. Особено се препорачува сок од цреша, сок од цвекло и кофеин. За појадок, комбинирајте овесна каша со цреши и ф'стаци и шолја кафе.
Зголемете го внесот на омега-3 масни киселини
Омега-3 масните киселини од масни риби како лосос или харинга можат да го намалат воспалението и болката во мускулите. За брз оброк по тренинг, пробајте тост со сардини или кајгана со чаден лосос.
Не заборавајте на јаглехидратите и протеините
За целосно закрепнување, важно е да се консумираат и јаглехидрати и протеини по тренингот, во сооднос 3:1. Оваа комбинација спречува разградување на мускулите и ја поттикнува регенерацијата на мускулите. Рецептите за брзо закрепнување вклучуваат чоколадно млеко, смути од овошје и грчки јогурт или урда со овошје и јаткасти плодови.
