Лесен, миризлив и заситувачки - ѓувечот со тиквички и пилешко е одлична идеја за ручек.
Ѓувечот со тиквички е едно од оние јадења што мириса на убаво домашно готвено. Изобилство од зеленчук, сочни тиквички и ориз се крчкаат заедно додека не развијат богат, заокружен вкус, сето тоа со минимален напор. Може да се сервира како самостојно, посно јадење или со малку додадено месо за оние што претпочитаат пообилен оброк.
Ако сакате појак вкус, пржете ги тиквичките кратко во масло пред да ги додадете - ќе имаат поубава текстура и арома.
Потребни состојки:
- 1 кг тиквички
- 1 голем кромид
- 1 црвена пиперка
- 1 морков
- 300 гр ориз
- 500 гр домати или пелат
- 3 лажици масло
- 1 лажичка мелен црвен пипер
- сол
- бибер
- 500 мл вода
- магдонос
- 700 гр пилешки копани и докопани
Подготовка:
Измијте ги тиквичките и исечете ги на полумесечини, а кромидот, пиперката и морковот ситно исечкајте ги.
Во длабоко тенџере или тава загрејте го маслото и пржете го кромидот додека не стане проѕирен. Додадете ги морковите и пиперките, па пржете уште неколку минути. Додадете ги тиквичките и пржете 5–6 минути додека малку не омекнат. Додадете го измиениот ориз, промешајте, па додадете ги ситно исечканите домати или пелатот (со нивниот сок).
Додадете сол, бибер и мелена блага пипер. Прелијте со околу 500 мл вода и добро измешајте.
Месото пропржете го одделно, а потоа наредете го врз зеленчукот пред печење. Префрлете сè во плех за печење или сад за печење, покријте го со фолија и печете на 200°C околу 25 минути. Отстранете ја фолијата и печете уште 10 минути за да добиете убава кора. Сервирајте топло, наросено со сечкан магдонос.
