Миризливи печени јаболка, мек пандишпан и лесен шлаг ја прават оваа торта совршен избор за секоја пригода.
Овој едноставен рецепт го најдовме на познатиот хрватски YouTube канал Recepttura.
Потребни состојки:
за овошниот дел:
- 6 јаболка
- 75 грама шеќер
- 1 лажичка мелен цимет
за пандишпанот:
- 5 јајца
- 5 лажици шеќер (65 грама)
- 5 лажици брашно (40 грама)
- ½ кесичка прашок за пециво
- 1 кесичка ванилин шеќер
за декорација:
- 500 мл шлаг
Подготовка:
Измијте ги, излупете ги и исечете ги јаболката на половинки, потоа отстранете ги семките и исечете ги на парчиња со дебелина од околу 8 милиметри. Посипете ги со цимет и мала количина шеќер.
Намастете тава за печење со путер и брашно и на дното премачкајте го остатокот од шеќерот. Загрејте ја рерната на 180 степени и печете ги јаболката околу 25 минути.
Во меѓувреме, подгответе го пандишпанот. Одделете ги белките од жолчките. Матете ги белките додека не се стврднат. Додадете го шеќерот и ванилиниот шеќер во жолчките и матете додека не добиете пенеста смеса. Додадете го брашното и прашокот за печиво и соединете сè во мазна смеса.
На крај, постепено додавајте ги белките, мешајќи нежно за смесата да остане воздушеста. Извадете ги печените јаболка од рерна и рамномерно распоредете го подготвениот пандишпан врз нив.
Печете го колачот уште 20 минути на 180 степени, а потоа проверете со чепкалка за заби дали е печен. Доколку е потребно, продолжете го времето на печење за уште 5 минути.
По печењето, извадете го колачот од рерна и оставете го неколку минути, а потоа внимателно превртете го на чинија. Оставете да се олади на собна температура. Изматете го кремот додека не стане цврст, потоа намачкајте го врз изладениот колач и рамномерно распоредете го. Ставете го колачот во фрижидер најмалку 4 часа пред сервирање.
