Дали барате идеја за брза и вкусна вечера? Ова кремасто ризото со печурки ќе биде готово за помалку од половина час.
Ризотото комбинира печурки, кромид и крем за готвење, создавајќи совршено избалансиран оброк подготвен за кратко време.
Идеално е за брза вечера кога сакате нешто топло, хранливо и брзо.
Напомена: Рижото е србизам, додека правилно на македонски е ризото, како што всушност е и во оригинал на италијански. Доаѓа од италијанскиот збор risotto (ризото) бидејќи се прави од ориз (riso - ризо). Самото јадење потекнува од Северна Италија, односно од регионите Пиемонт, Ломбардија и Венето.
Потребни состојки:
- 1 чаша ориз
- 150 гр печурки
- 1 мал кромид
- 2 лажици крем за готвење (или малку путер)
- маслиново масло
- сол
- бибер
- магдонос
Подготовка:
Пржете го кромидот во тава на малку маслиново масло, потоа додадете ги исечканите печурки и пржете 3 до 4 минути. Додадете го оризот и две чаши вода или супа. Покријте и гответе додека водата не испари и оризот не омекне (околу 20 минути).
На крај, додадете го кремот за готвење, зачинете и наросете со магдонос.
