Не мора секогаш да ги комплицирате работите ако сакате да ги изненадите вашите гости со вкусен десерт кој воедно изгледа убаво. Летните температури се идеални за уживање во сладолед и подготовка на едноставни десерти. Значи, можете да направите банана сплит.
Овој десерт е многу лесен за подготовка, а секогаш можете да го збогатите со додавање на други состојки како што се разни преливи, чоколадни трошки, па дури и овошје како јагоди, боровинки и слично.
Потребни состојки:
- сладолед
- банани
- 1 портокал
- шлаг
- чоколаден или друг прелив
- чоколадни трошки
Подготовка:
За почеток, извадете го сладоледот од замрзнувачот за малку да омекне, за полесно да се извади. Потоа започнете со подготовка на бананите.
Излупете ги бананите и прелијте ги со свежо исцеден сок од портокал. Овој чекор е многу важен за да не потемнат бананите за време на подготовката и препорачливо е да не го избегнувате ако сакате вашиот десерт да изгледа како оној од слаткарница.
Исечете ја бананата на половина по должина и ставете ги на двата краја од садот во кој ќе го сервирате десертот. Извадете три топки сладолед и наредете ги меѓу бананите.
После тоа, следува декорацијата. Идеално е ако имате шлаг во шише со распрскувач бидејќи е поцврст и полесен за употреба и не би губеле време подготвувајќи го, но ако немате, можете претходно да изматите шлаг од кесичка или тетрапак.
Потоа додадете го преливот, чоколадните трошки и парчињата овошје, кои исто така малку ќе ги прелиете со исцеден сок од портокал за ниту тие да не потемнат.
