Сезоната на зимници официјално почна, а пазарите низ Македонија се полни со зеленчук и овошје потребни за подготовка на традиционалните специјалитети како ајвар, лутеница, кисели краставички, мармалади и, секако, домашен кечап.
И покрај повисоките цени на пиперките и доматите, кои се забележително повисоки од претходните години поради намалените приноси и климатските услови, интересот кај граѓаните постепено се зголемува како што навлегуваме подлабоко во есента. Подготовката на зимница бара внимание и прецизна организација, бидејќи цените на суровините и трошоците за производство се покачени, но домашните домаќинства не ја запоставуваат традицијата на конзервирање. Оваа сезона, зимницата ќе се направи во помали количини, но со истата љубов и посветеност што ја карактеризира македонската кујна.
Ние ви споделуваме рецепт за најдобриот домашен кечап што може да го подготвите во количина колку што сакате.
Состојки:
5 кг домати
300 г шеќер
100 г сол
150 г густин (скроб)
100 мл оцет
малку оригано
2 г конзерванс (опционално)
Начин на подготовка:
Измијте ги доматите, исечкајте ги и ставете ги во големо тенџере да се варат.
Откако ќе омекнат, пасирајте ги доматите убаво со блендер или пасатор.
Во тенџерето додадете шеќер, сол, густин, оцет, оригано и ако сакате, конзерванс. Убаво измешајте.
Варете на умерена температура постојано мешајќи додека смесата не згусне и се добие текстура на кечап.
Во меѓувреме, стерилизирајте тегли и капачиња со врела вода или во рерна.
Кога кечапот ќе се згусне, ставете го жежок во теглите и затворете ги добро.
За долготрајна конзервација, варете ги наполнетите тегли 10-15 минути во врела вода.
Оставете теглите да се изладат добро на собна температура, а потоа чувајте ги на ладно и темно место.
Доколку е потребно, може да се додадат и повеќе зачини за поинтензивен вкус според ваш вкус.
