Чувството на надуеност, хроничен умор или постојан глад, дури и по оброците, може да укажува на недостаток на важна хранлива материја: влакна. Недостатокот на влакна може да се манифестира на различни начини, од бавно варење до проблеми со кожата. Ова се осум знаци кои може да укажуваат дека на вашето тело му недостасуваат влакна, како и совети како лесно да го поправите тоа.
Често чувство на надуеност
Бактериите во цревата зависат од влакната за нивно правилно функционирање. Ако не консумираме доволно од нив, варењето станува побавно, а чувството на надуеност станува почесто. Исхраната богата со масна и солена храна, без нутритивна поддршка за здравјето на цревата, дополнително го забавува разградувањето на храната.
Покрај недостатокот на влакна, надуеноста може да биде предизвикана и од пребрзо јадење или голтање воздух за време на оброците. Затоа, важно е да се обрне внимание на темпото на консумирање храна.
Чувство на глад дури и по оброк
Ако сè уште чувствувате глад по голем оброк, можно е оброкот да не содржел доволно влакна. Храната богата со растителни влакна се вари побавно, бара повеќе џвакање и на тој начин му дава на телото повеќе време да сигнализира ситост. Влакната, исто така, апсорбираат вода и го зголемуваат волуменот на желудникот, што дополнително придонесува за чувството на ситост и ја намалува потребата за прејадување.
Лош здив
Побавното варење, предизвикано од недостаток на растителни влакна, може да доведе до подолго задржување на храната во дигестивниот систем. Ова ја фаворизира ферментацијата и ослободувањето на непријатни мириси, што може да резултира со лош здив. Можни се и други дигестивни причини, како што е рефлукс на киселина.
Проблеми со запек
Еден од најчестите индикатори за дигестивни проблеми е запекот. Влакната апсорбираат вода и на тој начин ја омекнуваат столицата, олеснувајќи ја нејзината екскреција. Сепак, за влакната да имаат целосен ефект, потребно е истовремено да се пијат доволно течности.
Иако влакната можае да помогнат при почести празнења на цревата, тие не делуваат подеднакво добро на сите симптоми на запек, како што се болка или тврда столица. Нивната ефикасност зависи од причината, што може да биде поврзана со навики на живот, лекови или одредени болести.
Чувство на исцрпеност и замор
Недостатокот на влакна во исхраната често доведува до ненадејни скокови на шеќерот во крвта, особено кога се консумираат рафинирани јаглехидрати, преработена храна и печива. По почетниот наплив на шеќер, енергијата брзо опаѓа, предизвикувајќи чувство на исцрпеност. Влакната, од друга страна, ја забавуваат апсорпцијата на гликоза, одржувајќи постабилно ниво на енергија во текот на денот.
Кожа склона кон акни
Здравјето на кожата е тесно поврзано со здравјето на цревата. Кога цревните бактерии добиваат доволно влакна, тие помагаат во борбата против воспалението и ги регулираат хормоните, два клучни фактори во развојот на акни. Урамнотежената исхрана богата со влакна, исто така, може да има позитивен ефект врз јасноста на кожата.
Сува и иритирана кожа
Ниските нивоа на влакна во исхраната се поврзани со послаба хидратација. Влакната играат важна улога во одржувањето на хидрираноста на вашето тело. Ако имате проблеми со кожата како егзема или други форми на воспаление, можеби не внесувате доволно влакна во вашата исхрана. Сепак, важно е да се напомене дека влакната не ги предизвикуваат директно овие проблеми, туку можат да помогнат во ублажување на постојните симптоми.
Потешко ви е да ослабете
Исхраната со малку влакна може да ве натера да се чувствувате гладни почесто и да имате потреба да јадете почесто, што може да го отежни слабеењето. Исто така, високиот внес на јаглехидрати, наместо влакна, може да го зголеми нивото на шеќер во крвта и да поттикне складирање на масти.
Единствениот начин да се поправи недостатокот на влакна е да јадете повеќе од нив. Препорачаниот дневен внес е 25 грама за жени и 38 грама за мажи. Влакната се наоѓаат во многу видови храна: интегрални житарки, овошје, зеленчук, грав и мешунки.
