Наглите промени на времето – особено кога температурите ненадејно паѓаат за 10 степени Целзиусови и сувото, жешко време преминува во влажно и спарно – може значително да влијаат врз здравјето и благосостојбата.
Ваквите временски екстреми, дополнети со нагол пад на атмосферскиот притисок, посебно се опасни за хронично болните, постарите лица, децата и бремените жени.
Истовремено, овие промени носат ризик од сувост на дишните патишта, отпочнување или влошување на срцеви и мозочни болести и проблеми со крвниот притисок.
Симптомите како главоболка, летаргија, вртоглавица, пад на енергија и болки во зглобови се чести, а кај поосетливите се јавува и раздвиженост на расположението и ослабена концентрација.
Кога температурите наеднаш паѓаат и времето станува влажно, следете ги овие совети:
• Облечете повеќе слоеви облека од лесни, но топли материјали и носете суви алишта. Избегнувајте памук директно до кожа, подобро е да користите материјали кои ја оддалечуваат влагата.
• Ако е можно, останете во затворени простории и ограничете ги активности на отворено, особено наутро и навечер кога порастот на влажноста е најголем.
• Консумирајте топли, незасладени и неалкохолни напитоци. Алкохолот создава лажен осет на топлина и го зголемува ризикот од хипотермија.
• Постарите лица и хронично болните да внимаваат на симптоми како срцебиење, тешка глава, вртоглавица, замор и да земаат терапија како што им е препишано. Промените во притисокот можат да предизвикаат срцеви и мозочни компликации, како и влошување на болки во зглобовите.
• Зголемете ја хидратацијата: влажното и спарно време не значи дека телото не губи течности – напротив, потењето понекогаш е посилно и ризикот од дехидратација поголем.
• Погрижете се домот да биде сув и добро проветрен: вишокот влага го влошува чувството на студ и замор.
Доколку почувствувате нагла слабост, заматен вид, силна болка во градите, губење свест или потешкотии со дишењето, веднаш побарајте медицинска помош – ваквите симптоми може да се поврзани со нагол пад на притисок или други здравствени ризици.
Приспособете ги дневните активности на временските услови – здравјето секогаш нека ви биде приоритет.
