Бананите се омилено овошје за многумина поради нивната практичност и хранлива вредност. Тие се богати со растителни влакна, калиум и антиоксиданси, што ги прави одличен избор за заситувачка и енергична ужина. Иако не постои едно „совршено“ време да ги јадете, различните периоди од денот нудат специфични придобивки, во зависност од вашите здравствени цели и начин на живот, според Health.com.
Започнувањето на денот со банана ќе ви обезбеди брз извор на енергија по ноќен пост. Една средна банана содржи околу 90 калории и речиси 27 грама јаглехидрати и природни шеќери. Нејзините влакна, особено отпорниот скроб во помалку зрелите банани, го поттикнуваат чувството на ситост и помагаат во контролата на апетитот наутро. Тие го подобруваат варењето и можат да дејствуваат како природен антацид, неутрализирајќи ја желудочната киселина што се насобрала преку ноќ.
Многу луѓе доживуваат пад на енергијата во текот на денот, а бананата може да биде едноставно и ефикасно решение. Нејзините јаглехидрати и природни шеќери обезбедуваат дополнително „гориво“ за надминување на попладневниот замор.
Бидејќи е богата со растителни влакна и малку калории, го зголемува чувството на ситост и помага во контролата на гладот до вечерниот оброк. Покрај тоа, придонесува за хидратација. Содржи околу 75 проценти вода, а калиумот помага во регулирањето на рамнотежата на течностите во телото.
Јадењето банана навечер може да придонесе за подобар сон. Таа е богата со триптофан, аминокиселина што телото ја користи за создавање серотонин и мелатонин, хормони кои се клучни за регулирање на расположението и циклусот на спиење. Високите нивоа на магнезиум и витамин Б6 дополнително го поттикнуваат релаксацијата.
Бананата може да ве држи сити во текот на ноќта и да спречи доцноноќно грицкање што го нарушува сонот. Сепак, не се препорачува да ја јадете непосредно пред спиење за да избегнете можна надуеност или ненадеен скок на шеќерот во крвта.
Бананата е одличен избор пред или по тренингот. Нејзините лесно сварливи шеќери брзо ги зголемуваат нивоата на енергија потребни за вежбање. Иако доказите се мешани, се верува дека високата содржина на калиум може да помогне во спречување на мускулни грчеви. По вежбањето, бананите придонесуваат за закрепнување на мускулите, го намалуваат воспалението и ги надополнуваат резервите на гликоген, енергијата што мускулите ја користат за време на активноста.
