Британскиот остеопат Џејмс Дејвис претстави едноставна десетминутна рутина за луѓе со блага до умерена болка во грбот предизвикана од секојдневните навики, која треба да се прави 10 дена по ред.
Џејмс Дејвис, остеопат од Велика Британија, вели дека околу 80% од населението ќе доживее болки во грбот во одреден момент од својот живот, но дека повеќето од овие проблеми не се резултат на сериозно оштетување, туку на седење, лошо држење на телото и недостаток на движење.
„Поголемиот дел од болките во грбот што ги гледам се предизвикани од начинот на живот, тие се мали и многу лесни за санирање. Секој ден се среќавам со вакви случаи во клиниката“, објаснува тој, пренесува Metro.
Поради честите поплаки од пациентите, тој смислил 10-минутен метод што препорачува да се прави десет дена по ред. Сепак, нагласува дека методот се однесува на лесна до умерена болка поврзана со начинот на живот.
Ако болката е со интензитет од 8 од 10 или повеќе, ако го спречува движењето или е придружена со вкочанетост, слабост, болка што се шири по ногата, губење на контролата врз мокрењето или се јавува по пад и се влошува, потребно е итно да се побара стручна помош.
Дејвис разликува неколку типични тегоби: мускулна болка во долниот дел од грбот што се јавува по продолжено седење или напорен ден, постурална болка што полека се зголемува поради часови поминати на биро или на телефон, вкочанетост на зглобовите што се јавува при станување по долго седење и блага иритација на дисковите, што најчесто значи дека 'рбетот е под притисок поради лошо држење на телото и движење, а се ублажува кога лицето повторно се движи правилно.
Десетминутната рутина се состои од четири дела. Прво, треба да направите две до три минути нежно движење на грбот во лежечка положба, со колената повлечени кон градите и нежни ротации за да ја намалите вкочанетоста. Потоа, поминувате две минути во декомпресија, лежејќи на грб со нозете кренати на стол или свиткани колена, дишејќи полека и опуштајќи го грбот за да го ослободите оптоварувањето на 'рбетот.
Следните три минути се посветени на зајакнување, преку едноставни вежби како што се штици, кревање на колковите од лежечка положба или кревање на спротивната рака и нога додека сте на сите четири, што гради потпора околу 'рбетот. Конечно, има 2 минути релаксација, со нежна масажа на долниот дел од грбот или колковите или лежејќи мирно и дишејќи полека за да се намали напнатоста. Целата вежба треба да се повторува секој ден 10 дена. За оние кои сè уште немаат болки во грбот, Дејвис ја нагласува важноста на превенцијата.
„Превенцијата е сè. Пред сѐ, движете го вашето тело секој ден. Вашиот грб е направен за движење. Најголемиот проблем што го гледам е што луѓето предолго остануваат во истата положба“, истакнува тој. Препорачува редовно станување, одење, истегнување и менување на положбата, дури и без целосен тренинг.
Вториот клуч е зајакнување на мускулите што го поддржуваат вашиот 'рбет - глутеусите, стомачните мускули и колковите - бидејќи ако се слаби, поголемиот дел од товарот го носи долниот дел од грбот.
„Неколку едноставни вежби за сила ќе го заштитат вашиот грб на долг рок“, вели Дејвис.
Советува и да се обрне внимание на малите секојдневни навики, како што се начинот на кој седите, спиете, носите чанта или го држите телефонот, бидејќи несвесното кревање на рамената кон увото и свиткување на вратот за време на долги разговори ставаат дополнителен товар на вашиот 'рбет. Според него, повеќето луѓе не сфаќаат дека ова се навиките што постепено им предизвикуваат проблеми со грбот.
