Спакуваните салати од супермаркет можат да содржат паразити и бактерии кои предизвикуваат сериозно повраќање и дијареја, а ризикот е поголем кај чувствителните луѓе.
Примоз Фристон, професорка по микробиологија на Универзитетот во Лестер, изјави дека би ги избегнувала ваквите производи бидејќи патогените можат брзо да се размножуваат во кесички, дури и кога се чуваат во фрижидер, и да се закачат на пластиката. Во изјава за The Times, таа, меѓу другото, рече: „Не би допрела зелена салата од кеса ни за миг“.
Предупредувањето доаѓа во време на ширење на циклоспоријаза, паразитска инфекција поврзана со контаминирана храна и вода што предизвикува тешка дијареја, грчеви во стомакот и повраќање. Повеќе од 22.000 случаи се пријавени во САД годинава, со два смртни случаи и стотици хоспитализации. Случаи на инфекцијата неодамна се пријавени и во Обединетото Кралство.
Контаминираната зелена салата е веројатна причина за сегашната епидемија, но тоа не е единствениот проблем поврзан со лиснатите зеленчуци. Минатата година, британската здравствена агенција УКХСА објави зголемување од 26% на редок сој на бактеријата ешерихија коли поврзана со салата во спакувани сендвичи и тортиљи, што резултираше со хоспитализација на 86 лица.
Фристон наведува дека лиснатата текстура на зелената салата го фаворизира задржувањето на микроорганизми, а дополнителен ризик е што таквата храна најчесто се јаде сурова. Препорача претходно измиените салати повторно да се исплакнат со вода од чешма, но предупреди дека на овој начин ризикот може само да се намали, а не и целосно да се елиминира. Додаде дека темните, влажни лисја укажуваат на расипување на производот и дека таквата салата треба да се фрли.
