Некои мачки се познати по своето мјаукање, додека други можат да бидат целосно тивки, а ако имате „зборливо милениче“, важно е да препознаете што се обидува да ви каже.
Експертот за однесување на мачки, Аманда Кампион, објасни што стои зад ваквото однесување.
„Сијамските и ориенталните мачки се познати по своите вокализации, па ако ги имате овие домашни миленици, очекувајте многу 'зборување'“, тврди таа.
Друга причина зошто мачките мјаукаат е за да бараат внимание.
„Мачките ќе ви дадат до знаење со своите гласови дали се гладни, осамени или им е здодевно. Мјаукањето може да биде резултат и на нарушена рутина. Покрај тоа, предвидливоста е важна за мачките. Ако го пропуштите времето за оброк или игра, тие дефинитивно ќе ви дадат до знаење“, објасни Кампион.
Експертката предупреди дека ненадејната вокализација може да биде знак на стрес или болест, ако инаку мирна мачка одеднаш почне често да мјаука, се препорачува посета на ветеринар за да се исклучат здравствени проблеми.
Кај постарите мачки, мјаукањето може да биде поврзано со когнитивен пад, што резултира со тоа што мачките стануваат позбунети, поповлечени и почувствителни на одвојување.
Американското здружение за заштита на животните наведува дека мачките мјаукаат од различни причини, како што се желба за здраво, барање внимание, желба за храна, барање дозвола за излегување или влегување и за време на сезоната на парење за да привлечат партнер.
За да се намали непотребното мјаукање, се препорачува конзистентна рутина на хранење во исто време, игнорирање на несаканото мјаукање и обезбедување пристап до надворешниот свет.
