Родителството е интензивен процес кој вклучува обиди, грешки и многу љубов, а преку корисни обрасци на однесување, можно е да се израснат трпеливи деца.
Во својата книга „A Contented Child in 28 Days“ (Задоволно дете за 28 дена), психологот од „Харвард“, Ричард Бромфилд, открива корисни совети за тоа како да се скршат моделите на прекумерно попуштање на децата и објаснува како може да им се помогне да прераснат во емоционално стабилни и навистина задоволни личности.
Еден од најголемите предизвици на родителството, според него, е сеприсутната култура на моментално задоволување, а тоа го потврди и психологот Марк Трејверс.
„Децата денес имаат моментален пристап до сè, од забава до шопинг, што го отежнува развојот на трпение и издржливост. Една од најважните вештини што треба да ги научат децата е чекањето. Важно е да ги научите децата на трпение“, изјави Трејверс за Psychology Today.
Тој објаснува дека е важно да се користат едноставни секојдневни ситуации кои ќе ги научат децата да се справуваат со фрустрациите и да развијат самоконтрола. Трејверс, исто така, советува да се воведат тешко заработени награди, методи за штедење преку собирање поени или монети и да се охрабруваат децата да размислуваат апстрактно за наградите за да се намали потребата за итно задоволување.
Наместо да им понудите на децата екран или играчка кога им е здодевно, психолозите предлагаат вие како родители да им дадете простор да најдат свој начин да се забавуваат.
„Досадата не е проблем, таа е неопходна“, вели Трејверс.
Кога нема надворешни потпори, мозокот на детето се активира и поттикнува имагинација, креативност и решавање проблеми. Покрај горенаведеното, се советува секојдневно време без екран и планирана забава за децата повторно да ја откријат радоста на играта што доаѓа од внатре, а не од надворешни извори.
