Истражувањата покажуваат дека влажните површини внатре во клима-уредите можат да претставуваат погодна средина за развој на микроорганизми, вклучувајќи и мувла. Количината на микроби во клима-уредите зависи од климатските услови и ефикасноста на филтрите.
Сите клима-уреди можат да бидат подложни на развој на мувла. Мувлата е габа која природно постои во околината – како на отворено, така и во затворени простории – а за раст ѝ е потребна влага и извор на храна, како што е правот што го собираат филтрите на клима-уредите.
Најголем ризик од мувла се јавува во топли и влажни подрачја, каде што доаѓа до засилена кондензација на завојниците и вентилаторите на уредот.
Како што истакнува проф. д-р Џордан Пеција од Јејл, тоа ја зголемува можноста за создавање мувла. Наспроти тоа, во суви и топли региони како Аризона или делови од Калифорнија, количината на кондензација е помала, па развојот на мувла е пореток.
Мувлата се развива кога микроскопски спори ќе дојдат на влажна површина. Често не е видлива со голо око, но кога ќе се појави, знаците се:
- Променета боја, слузав слој на површините
- Траги од влага или деформирани пластични и метални компоненти
- Застојани, непријатни мириси
Изложеноста на мувла може да предизвика симптоми и кај лица кои не се алергични, додека кај чувствителните може да предизвика посилни тегоби:
- Јадеж, солзење или иритација на очите
- Течење на носот или затнат нос
- Кивање, главоболка, осип, јадеж на кожата
- Вртоглавица
- Кај лица со астма: отежнато дишење, свирење, чувство на притисок во градите
- Посебно чувствителни групи се децата, постарите лица и лицата со болести на дишниот систем.
Ако мувлата веќе се појавила, неопходно е темелно да се отстрани и да се отстрани причината за влагата за да не се развие повторно:
- Темелно чистење и сушење: Измијте ги погодените делови со блага сапуница, а потоа целосно исушете ги.
- Следете ги упатствата на производителот: Некои делови бараат расклопување на уредот – ако не сте сигурни, обратете се кај стручњак.
- Заштита при чистење: Носете ракавици, заштитна маска и очила. Ако имате астма или ослабен имунитет, консултирајте се со лекар пред чистењето.
Иако е невозможно целосно да се отстранат спорите на мувлата од просторот, растот може успешно да се спречи со контрола на влагата и редовно одржување на уредот.
Препораки од експерти:
- Редовно менувајте ги филтрите – најчесто на секои 60 до 90 дена, според упатствата на производителот.
- Контролирајте ја влажноста на воздухот – одржувајте ја влажноста под 60%, користете одвлажнувачи по потреба.
- Намалете ја количината на прав – редовно бришете го просторот околу уредот и размислете за прочистувач на воздух.
- Подобрете ги филтрите – ако сегашниот филтер не е доволно ефикасен, вложете во квалитетен модел кој подобро ќе го задржува правот и ќе спречува развој на мувла, дури и при помали нивоа на влага.
„Најлесен начин да спречите мувла во домашниот клима-уред е да обезбедите добро одводнување на кондензатот и да користите поефикасен филтер", советува д-р Пеција.
