Летото 2025 се очекува да донесе нов бран на интерес кај македонските туристи за евтини, но квалитетни дестинации на Јонското и Егејското Море.
Грција, како традиционално омилен избор, повторно се наметнува со атрактивни понуди за сместување, и покрај благото зголемување на цените во споредба со минатата година.
Македонските агенции веќе ги истакнaa најдостапните дестинации за оваа сезона, а туристите сè повеќе ги бираат економичните опции, балансирајќи помеѓу цената, квалитетот и близината.
Направивме анализа на понудите од македонските туристички агенции и трите најевтини дестинации за македонските туристи во Грција за лето 2025 се:
Врахос (Јонско Море) – Апартманско сместување започнува од околу 79 евра за ноќевање, што ја прави оваа дестинација една од најдостапните за семејства и групи пријатели кои сакаат мирен одмор на долги песочни плажи.
Сарти (Ситонија) – Апартманите во Сарти се движат од околу 99 евра за ноќ. Овој град на вториот крак на Халкидики е познат по комбинацијата на пристапни цени, уредени плажи и богата понуда на ресторани и забавни содржини.
Неи Пори (Пиериа) – Цените за апартмани и вили во Неи Пори се од околу 119 евра за ноќ. Ова место нуди долга плажа, лесен пристап и развиена туристичка инфраструктура, што го прави популарен избор за македонските туристи.
Во јуни, цените се пониски, со апартманско сместување од 70 до 90 евра за ноќ, додека во јули и август, кога побарувачката е најголема, цените се движат од 90 до 120 евра за ноќ. Во споредба со 2024 година, хотелското сместување е поскапо за околу 10-15%, додека апартманското останува релативно стабилно, со благо покачување. Ова се должи на зголемената побарувачка во шпицот на сезоната и инфлациските движења на пазарот.
Покрај овие три дестинации, популарни и поволни се и други места како Неа Каликратија, Флогита, Калитеа и Полихроно, каде може да се најдат апартмани од 99 до 129 евра за ноќ, особено ако се резервираат навреме. Островите Тасос и Лефкада, иако малку поскапи, нудат пристапни аранжмани, особено во предсезона или крај на сезона.
Кога станува збор за локалните цени за храна во туристичките дестинации како Врахос, Сарти и Неи Пори, туристите можат да очекуваат прифатливи трошоци кои дополнително го прават одморот достапен.
Во Врахос, кој е познат по своите таверни и рибни ресторани долж брегот, цените за појадок или лесен оброк (кафе и печива) се движат од 3 до 5 евра, додека во локалните таверни главно јадење како свежа риба или морски плодови чини од 8 до 15 евра по порција.
Во Сарти, кој има развиена гастрономска понуда, слични се цените: гиро или сувлаки за брз ручек може да се најде за 3-4 евра, а класичен ручек во ресторан со салата и пијалок чини од 10 до 18 евра по лице.
Во Неи Пори, кој е популарен за семејства, цените во маркетите се слични на оние во Македонија, додека во рестораните главните јадења се движат од 9 до 16 евра. Повеќето дестинации нудат и економични менија за деца и групи, а локалните таверни често имаат дневни понуди со свежа риба, морски плодови или традиционални јадења по поволни цени. Дополнително, во сите овие места има голем избор на пекарници, супермаркети и улични штандови каде може да се купи свежо овошје, слатки или брза храна по ниски цени, што овозможува флексибилност и за туристите со поограничен буџет.
