Националниот парк сè повеќе се развива како дестинација за еко-туризам, привлекувајќи љубители на природата од земјата и странство. Паркот придонесува за одржлив развој на регионот, нудејќи еколошки прифатливи активности што ја почитуваат и штитат природната средина и ја зајакнуваат локалната економија
Шар Планина е последниот прогласен Национален парк во Република Македонија. Богатиот диверзитет на флората и фауната, важноста на овој предел за еколошката и хидролошка слика на државата придонесоа ова подрачје да се стави под поголема заштита на државата.
„Шар Планина е дом на голем број видови, а над 200 растителни видови се балкански или локални ендемити. Тоа значи дека не постојат на ниту едно друго место во светот и секако тука ќе ги потенцирам загрозените животни. Со воспоставувањето на паркот, се забрануваат активности кои ги загрозуваат видовите како што се: неконтролирано сечење и уништување на шуми, криволов, загадување на езерата и реките, недозволена градба итн. Воедно, паркот врши научен мониторинг, со помош на биолози и чувари на природата, што овозможува следење на популацијата и здравјето на видовите, објаснува Aнела Ставревска Панајотова, раководителка на одделението за заштита на природа во ЈУ Национален Парк Шар Планина.
Таа додава дека денес Шар Планина е далеку повеќе посетена од туристи, домашни и странски, од научници и од вљубеници во природата.
„Националниот парк Шар Планина сè повеќе се развива како дестинација за еко-туризам, привлекувајќи љубители на природата од земјата и странство. Паркот придонесува за одржлив развој на регионот, нудејќи еколошки прифатливи активности што ја почитуваат и штитат природната средина, а воедно и ја зајакнуваат локалната економија. Како институција која постои само 3 години, за поттикнување на еко-туризмот всушност првите напори ги правиме оваа година. Во тек се иницијативи за поставување на нови информативни табли и патокази, засолништа, информативен центар, реконструкција на парковска инфраструктура, бележење на планинарски патеки итн., но не чека многу работа, а за жал работите не одат секогаш според планираното поради многубројни административни процедури, политички процеси во државата и недостаток на средства. Во тек е и поддршка за локални бизнис иницијативи кои ќе придонесат за развој на туризмот но воедно и ќе придонесат кон спроведување на активности од планот за управување со подрајчето, вели таа.
Ставревска посочи и дека во неколку села жителите веќе ги адаптираат или реновираат семејните куќи за сместување на туристи, додавајќи дека овој предел треба да биде простор каде луѓето и природата треба да функционираат во рамнотежа и хармонија.
Пивара Скопје преку платформата „Наша гордост, наша одговорност“ потпиша Меморандум за соработка со ЈП Национален парк „Шар Планина“ за заеднички активности, кои ќе придонесат за заштита и унапредување на ова непроценливо природно богатство.
Една од овие активности беше еко-акцијата за чистење на излетничкото место Лисец на Шар Планина, која се одржа на 7 мај. Во акцијата учествуваа 23 волонтери, кои заедно со вработените од Националниот парк и партнерите од „Саубермахер“, собраа цели 1.300 килограми отпад – резултат, кој не само што говори за посветеноста на учесниците, туку и за важноста од заедничка акција за заштита на нашите планини.
