Англија и Скандинавија стануваат нови вински жаришта, додека Бордо и Бургундија ги губат своите титули на вински центри. Климатските промени не влијаат само на времето - тие го поместуваат и епицентарот на глобалната винска индустрија.
Климата се менува, а со неа и светската винска мапа и самите вина. Она што некогаш беше ексклузивитет на Јужна Европа - како Бордо или Бургундија - сега се сели на север. Англија, особено регионите како Јоркшир или градот Хал, добиваат на значење како нови потенцијални лидери во производството на вино, вклучувајќи го и познатото Каберне Совињон. Веќе денес, англиските пенливи вина добиваат глобално признание, додека Шведска и Данска се појавуваат како неочекувани играчи на пазарот со своите бели вина.
Според извештајот на Fine Wines and Restaurants Market Monitor, продолжените сезони на одгледување и поблагите зими им овозможуваат на северните региони успешно да одгледуваат сорти што некогаш биле резервирани за медитеранските земји. Регионите кои претходно не можеа да одгледуваат одредени сорти сега можат.
Освен во Европа, винскиот потенцијал се шири и во Азија и Америка. Кина развива лозарство во региони како што се Ниншја и Јунан, додека во САД сериозни вина се произведуваат во држави како што се Вирџинија, Мериленд и источен Лонг Ајленд.
За разлика од овој напредок, историските вински региони претрпуваат сериозни загуби. Бордо во 2023 година имаше најниско производство од 1991 година, а Шабли изгуби дури 60% од својата жетва поради временски услови како што е мразот. Исто така, лошите временски услови влијаеле врз појавата на мувла.
Винарите се обидуваат да одговорат на предизвиците со садење поотпорни сорти, рани берби и експерименти во технологијата на производство, но многумина се прашуваат: дали семејните лозја се одржливи на долг рок?
Иако постои прашање дали иконските вина би можеле да исчезнат, експертите веруваат дека познатите региони како Бургундија и долината Напа нема да исчезнат. Тие ќе мора да се променат. Наместо класичните Пино Ноар или Каберне, можеби ќе видиме нови сорти и хибриди, кои веќе успешно се одгледуваат во Германија, Орегон и други делови од светот.
Винариите низ целиот свет ги отвораат своите врати за нови вински приказни. Без оглед на промените, виното сè уште ќе го носи во себе тероарот и автентичниот потпис на луѓето кои со љубов го создаваат.
