На листата на најатрактивни земји за преселба во 2025 година според компанијата Remitly, Исланд го зазеде првото место.
Анализирајќи 82 земји низ 24 клучни фактори, вклучувајќи јавен превоз, вработување, трошоци за живот и задоволство на граѓаните, Исланд постигна вкупен резултат од 58,4 поени на скала од 100.
Оваа нордиска земја се истакна по високиот квалитет на живот, ниската стапка на криминал, ефикасниот јавен транспорт и општото чувство на задоволство кај населението.
Исланд со години се смета за симбол на стабилност, безбедност и општа благосостојба. Покрај уникатните природни пејзажи, Исланд ја носи титулата најбезбедна земја во светот, а високо котира и на листата на најсреќни и најопуштени нации.
Главниот град Рејкјавик има околу 140.000 жители и ги нуди сите удобности на модерниот урбан живот, од шармантни кафулиња и ресторани до богата културна и ноќна сцена.
Просечната месечна плата е околу 4.500 евра, што дополнително придонесува за висок животен стандард. Со уникатни природни убавини како што се полуостровот Снафелснес и патеката Златен круг, Исланд е идеален избор за луѓето кои бараат мир, безбедност и врска со природата.
На листата на најпосакувани дестинации за преселување по Исланд се: Швајцарија, Луксембург, Норвешка, Обединети Арапски Емирати, Ирска, САД, Данска, Холандија и Австралија.
