Човечкото тело секој ден е изложено на оксидативен стрес - процес во кој се создаваат вишок слободни радикали кои можат да ги оштетат клетките и да го забрзаат стареењето на телото.
Иако слободните радикали се јавуваат природно, нивната концентрација значително се зголемува поради влијанието на надворешни фактори како што се загадувањето на воздухот, пестицидите, УВ зрачењето, како и нездравите навики во животниот стил како што се лошата исхрана, пушењето и недостатокот на сон.
Долгорочната изложеност на оксидативен стрес е поврзана со хронично воспаление и развој на бројни болести, вклучувајќи кардиоваскуларни заболувања, дијабетес и одредени видови рак.
Подолу ви претставуваме 5 видови овошје кои се издвојуваат по своите антиинфламаторни и антиоксидантни ефекти.
Боровинките се вистински синоним за „суперовошје“. Нивната темносина боја доаѓа од антоцијанинските соединенија кои ги намалуваат воспалителните процеси и ги штитат клетките од оштетување. Покрај тоа, тие содржат флавоноиди и фенолни киселини кои придонесуваат за здравјето на мозокот и срцето, а исто така можат да помогнат во регулирањето на телесната тежина. Во 100 грама боровинки има околу 9 милимоли антиоксиданси.
Семките од калинка се познати по нивната висока содржина на антиоксиданси и уникатното соединение пуникалагин, за кое во лабораториските студии е докажано дека го забавува растот на клетките на ракот. Редовното консумирање на калинки може да помогне во спречување на дебелина, дијабетес и срцеви заболувања. Порција од 100 грама содржи приближно 9 милимоли антиоксиданси.
Капините се вистински мали хранливи бомби. Освен што се богати со витамини А и Ц, содржат и бројни фенолни соединенија и антоцијанини кои придонесуваат за намалување на воспалителните процеси. Благодарение на нивното високо ниво на антиоксиданси, капините помагаат во заштитата на клетките и зајакнувањето на имунитетот. 100 грама капини содржат околу 6 милимоли антиоксиданси.
Црешите се богати со полифеноли, витамини и мелатонин, што ги прави одличен сојузник против воспаление, но и во подобрувањето на квалитетот на спиењето. Нивното умерено антиинфламаторно дејство се покажало како корисно и за спортистите, бидејќи помага побрзо да се опорават мускулите. 100 грама цреши содржат до 7 милимоли антиоксиданси.
Малините се богати со антоцијанини, елагитанини и витамин Ц - соединенија кои помагаат во борбата против оксидативниот стрес и воспалението. Редовното консумирање малини може да придонесе за заштита на клетките и да го намали ризикот од хронични заболувања. Во 100 грама има приближно 4 милимоли антиоксиданси.
