За време на топлотен бран, многу луѓе го оставаат вентилаторот вклучен до утрото, но експертите предупредуваат дека овој метод на ладење може да предизвика повеќе здравствени проблеми.
Вентилаторот може да го олесни спиењето во прегреана просторија, но ноќниот проток на воздух не е без последици. Д-р Хана Пател вели дека луѓето со алергии на прашина или полен може да доживеат потешки симптоми бидејќи вентилаторот ги шири алергените низ просторијата и ја зголемува веројатноста тие да бидат вдишани или да дојдат во контакт со кожата, пишува Metro.
Како најчести знаци ги наведува будењето со болно грло, чешање или кивање. Додава дека прашината, грињите, спорите и поленот што ги создава вентилаторот можат да ја влошат астмата, па затоа кај некои луѓе, особено кај децата, може да предизвика повеќе проблеми отколку придобивки.
Терапевтката за спиење Натали Пеникот-Колиер вели дека вентилаторот што работи цела ноќ ги суши мукозните мембрани на носот, грлото и горниот респираторен тракт, предизвикувајќи телото да произведува повеќе слуз. Затоа некои луѓе се будат со затнат нос, иако не е настинка.
Ладниот воздух може да влијае и на мускулите. Ако вентилаторот е поставен премногу блиску, постојаното дување може да предизвика мускулна напнатост за време на спиењето, па затоа може да се разбудите наутро со болка или грчеви, а постојните тегоби може да бидат поизразени.
Експертите предупредуваат и на суви очи, уста и кожа, особено ако воздухот дува директно во лицето. За да ги намалат негативните последици, советуваат вентилаторот да го насочите кон ѕидот или таванот, да го користите само пред спиење или со тајмер и редовно да го чистите и него и просторијата каде што спиете. Исто така, препорачуваат консумирање доволно течности во текот на денот.
