Ако некогаш сте забележале дека вода капе од вашиот клима-уред, причините може да бидат помали или поголеми.
Честа непријатност со која се соочуваат многумина е клима-уред што протекува. Ако сте забележале вода што капе, сигурно сте се запрашале зошто се случува тоа и како да го решите. Во овој текст ги објаснуваме можните причини за протекување и нудиме практични решенија за да го задржите вашиот дом безбеден.
За да разбереме зошто климата протекува, прво мора да го објасниме основниот принцип на нејзиното работење. Сплит систем клима-уредот се состои од две единици – внатрешна и надворешна. Во внатрешната единица се наоѓа испарувач кој пренесува топлина или студ помеѓу флуиди или помеѓу флуид и цврста површина.
Секојпат кога ја вклучувате климата, испарувачот се полни со гас под низок притисок што овозможува ладење на воздухот. Кога гасот се лади, доаѓа до кондензација, па се создава вода што капе и се собира во посебен сад за кондензат во внатрешната единица. Потоа, водата оди преку цевка што ги поврзува внатрешната и надворешната единица. Водата што тече од таа цевка често се гледа како протекување.
Во нормални услови, оваа вода правилно се одведува, но има ситуации кога може да дојде до протекување и потенцијално оштетување на уредот или просторот.
Причините може да се помали и поголеми, па ќе ги поделиме така.
Помали проблеми:
Валкан филтер – ако е филтерот валкан, доаѓа до натрупување влага што не може правилно да се отстрани, па почнува да капе. Решението е да го исчистите или замените филтерот.
Затната цевка за одвод – ако цевката за одвод е затната, водата не може да истече и се враќа назад во внатрешната единица, па почнува да протекува. Може да се обидете да ја исчистите со тенка и флексибилна жица.
Проблем со садот за кондензат – ако садот е напукнат, оштетен или не е добро поставен, водата нема правилно да истече, туку ќе протекува. Во тој случај, садот треба да се замени.
Посериозни проблеми:
Протекување на ладилниот гас – ако гасот протекува, доаѓа до формирање мраз во внатрешната единица. Кога мразот ќе се стопи, водата може прекумерно да капе. Ова е сериозен дефект и бара интервенција од стручњак.
Проблеми со испарувачот – ако дојде до дефект на испарувачот (делот што го лади воздухот), може да дојде до зголемена кондензација и протекување. И ова е дефект што треба да го прегледа стручна личност.
- Исклучете го уредот од струја.
- Извадете ги филтрите – се наоѓаат на предната страна на внатрешната единица.
- Исчистете ги филтрите – ако не се многу валкани, можете да ги исчистите со четка. Ако се, потопете ги во млака вода со благ детергент, исчистете со четка и добро исперете.
- Оставете ги да се исушат – ставете ги на рамна површина и почекајте да се исушат пред да ги вратите.
- Вратете ги филтрите – кога ќе се исушат, вратете ги на место и уверете се дека се добро поставени.
Филтрите се препорачува да се чистат најмалку еднаш месечно во периодот на интензивна употреба, за да се одржи добра циркулација и да се спречи протекување.
Протекувањето вода од клима уредот најчесто е последица на валкан филтер, затнат одвод, оштетени компоненти или протекување на ладилен гас. Добрата вест е што повеќето од овие проблеми лесно се решаваат со редовно одржување и по потреба со помош на стручњак. Така не само што ќе спречите непријатни протекувања, туку ќе го продолжите и животниот век на уредот и ќе го подобрите квалитетот на воздухот во домот. Ако, и покрај сите обиди, вашата клима сè уште протекува, обратете се кај сервисер.
