Легендарниот боксер Мајк Тајсон (53) објави снимка од тренинг, откако пред десетина дена најави дека ќе се врати во рингот за хуманитарен меч од четири рунди.
Некогашниот светски првак во тешка категорија повторно ја одушеви армијата од фанови ширум светот, покажувајќи дека уште има брзина и сила за удар.
„Се вратив!“, порача Тајсон на крајот на видеото.
Популарниот боксер пред десетина дена преку видео го најави хуманитарниот настан за помош на бездомници и луѓе на кои дрогата му го уништила животот, зависност со која и самиот се има соочено.
Секојдневно добива примамливи понуди за враќање во рингот, од кои најнова и прилично неодолива е онаа од Дејвид Фелдман, претседателот на Bare Knuckle Fighting Championship, кој му понуди 20 милиони долари за камбек, со можност да го бира противникот.
Далеку помала, но прилично реална понуда дојде и од Австралија. Промотерот Брајан Аматруда изјави дека го исконтактирал агентот Макс Марксон и дека му понудил на Тајсон 1 милион долари за борба.
Потенцијални противници на шампионот би биле Бери Хол, Пол Гален и Сони Бил Вилијамс, познати имиња од австралиската рагби сцена кои претходно боксувале.
Тајсон стана најмладиот шампион во тешка категорија кога во 1986 година со само 20 години го победи Тревор Бербик. До пензионирањето има победено во 50 од 58 професионални борби.