Со волја, упорност и желба сè може да се постигне, доказ за тоа е Ангела Мартин, 40-годишна мајка на пет деца од Тасманија. Таа секој ден јадела по 30 лажички шеќер и тежела 90 килограми. Но, во еден миг сфатила дека е потребно да го смени начинот на живеење.
Од вишокот килограми младата мајка цело време се чувствувала уморно, а наутро кога се будела имала чувство дека не е доволно наспана.
„Имав болки во грбот и цело време се грижев за моето здравје. Имам прекрасно семејство, но се чувствував како да сум без енергија, бев исцрпена и не можев да уживам со нив“, вели Мартин.
Кога нејзиното петто бебе имало само 6 недели, во јули 2017 година Ангела одлучила да ја исфрли индустриски преработената храна од исхраната, како и триесетте лажички шеќер кои секој ден ги јадела. Почнала да им дава приоритет на свежите намирници и веднаш почнала да се чувствува подобро.
Мајката на пет деца почнала да јаде пет мали оброци дневно и од личност која никогаш не пиела вода почнала да пие два до три литри вода дневно. Освен промени во исхраната Ангела почнала и да вежба, а во тоа било вклучено трчање, брзо одење и дигање тегови.
Во период од десет недели изгубила 15 килограми и тоа било голема мотивација да продолжи со темпото. За една година изгубила 32 килограми и од величина XL почнала да носи XS. Сега има 58 килограми.
„Една од најдобрите работи е што ја открив љубовта кон трчањето и сега трчам дури и на маратони“, вели Ангела.
Таа додава дека се чувствува како некој да ѝ подарил неколку дополнителни години живот.
„Моето здравје ми е приоритет и конечно се чувствувам како најсреќната личност во светот“, вели Ангела.