Мајката на Кристијано Роналдо, Долорес Авеиро, изјави дека пред да почине има само една желба, а тоа е да го види нејзиниот син како повторно игра во дресот на Спортинг од Лисабон.
Откако од Реал Мадрид премина во Јувентус, а неодамна се врати во Манчестер Јунајтед, Роналдо би можел да ја заврши кариерата во саканиот клуб.
Барем тоа е желбата на неговата мајка со која има посебен однос, а нема сомнежи дека Роналдо би се обидел да ја исполни доколку за тоа се укаже прилика.
„Веќе му кажав на синот дека сакам да го видам како игра за Спортинг пред да умрам. Ако тој сепак не се врати, нека го наследи неговиот син Кристијанињо кој игра подобро отколку Кристијано“, изјави Долорес за португалскиот весник Рекорд.
Таа објасни дека Кристијано му е учител на синот и нејзиниот сон е заедно да ги види во Спортинг.
Роналдо потпиша двегодишен договор со Манчестер Јунајтед и ќе биде навистина интересно дали кариерата ќе ја заврши на Олд Трафорд или сепак ќе се одлучи да се врати во татковината.