Мајката на фудбалерот Кристијано Роналдо, Долорес Авеиро, ја промовираше нејзината книга „Мајка на храброста“ во која раскажува дека размислувала за абортус кога била бремена со четвртото дете, односно со Кристијано.
“Најубавото нешто што го имаме се нашите деца.“ Со оваа реченица Долорес ја почна промоцијата на книгата во Сао Пауло.
Татко ѝ ја напуштил кога имала шест години, израснала во сиропиталиште, а кога се вратила дома Долорес живеела во тешки услови.
Се омажила за Хосе Динис Алвеира со кој добила две деца пред тој да замине во војна. Кога се вратил од војната, бил друга личност, тврди таа. Се оддал на алкохол и тоа била причината зошто таа размислувала да ја прекине четвртата бременост.
„Веќе имав три деца, сакав да абортирам, но не можев. Благодарна сум што така излезе, бидејќи Кристијано е ѕвездата што го осветли мојот живот“, рече Долорес на промоцијата.
Таа им порача на сите жени да не абортираат, туку да продолжат да се борат.
„Многу сум свесна дека сум мајка на Кристијано Роналдо, но не го одвојувам од останатите деца. Таа разлика ја прави останатиот свет, но за мене тој е ист како и другите три деца“, рече таа.
Долорес исто така нагласи дека никогаш не можела ни да претпостави каде ќе ја однесе животот, иако знаела дека Кристијано го интересира само фудбалот.
Фановите на Роналдо дојдоа на промоцијата за да се фотографираат со Долорес и да земат нејзин автограм. Таа со насмевка примаше комплименти на сметка на нејзиниот син.
