Откако шестмина од таборот на Шкендија и Ренова добија позитивни тестови на коронавирусот, прволигашот од населбата Ѓорче Петров ги прекина тренинзите најавувајќи крај на сезоната.
Иако Македонија ЃП не објави дека се повлекува од продолжението на првенството, меѓу редови токму тоа се чита. Во соопштението објавено на клупската Facebook страница велат дека како одговорен клуб не сакаат да одат со глава во ѕид за по секоја цена да се продолжи прекинатото првенство.
Воедно, ги демантираа гласините кои одредени медиуми ги пласираа дека за деновиве закажале пријателски натпревар со лидерот Вардар како дел од подготовките.
„Ние како одговорен клуб за здравјето на нашите фудбалери и сите вработени во клубот ги прекинуваме сите активности од денеска, и чекаме нови насоки од Владата на РСM и ФФМ. Македонија ЃП отсекогаш била за решение на фудбалот на зелените терени, но со глава во ѕид не се оди. Се срамиме од вестите на некои медиуми и ги демантираме сите вести дека имаме закажано пријателски натпревар со ФК Вардар!“, се наведува во клупското соопштение.
Претходно „Лавовите“ најавија дека се категорично против одлуката на ФФМ сезоната да продолжи со играње, но без испаѓање.
