Фудбал
КВАЛИФИКАЦИИ ЗА ЕУРО 2020

Македонија поразена од Австрија

17. ноември 2019 - 9:25 | МИА

Виена, 16 ноември 2019 (МИА) – Фудбалската репрезентација на Македонија доживеа пораз со 2:1 на гостувањето кај Австрија во квалификациски дуел за ЕУРО 2020.

Со вечерашната победа, домаќините си обезбедија пласман на завршницата на континенталното натпреварување следната година. За нашата селекција останува шансата за пласман на ЕП 2020 преку баражот во Лигата на нации во март. Во полуфиналната пресметка играме со Косово.

Нашата репрезентација на „Ернст Хапел“ излезе во ослабен состав, откако поради повреди не настапија Адеми, Алиоски и Тричковски, Пандев се разболе, додека суспендирани беа Муслиу, Несторовски и Николов. Селекторот Ангеловски им даде шанса на неколку дебитанти.

Дејвид Алаба и Штефан Лајнер беа стрелци за Австријците, додека Влатко Стојановски беше прецизен за „црвено-жолтите“ во судиското надополнување што за него беше деби гол и тоа во деби натпреварот.

Нам ни останува последниот дуел од овој квалификациски циклус со Израел, откако со победа ќе се надеваме на пласман на третото место во групата Г.

Коментирај