Македонската фудбалска репрезентација оствари лесна и очекувана победа од 2:0 на гостувањето во Рига кај најслабиот противник во групата од квалификациите за пласман на ЕУРО 2020.
Уште во првите дваесетина минути Македонија ја осигура победата постигнувајќи два гола преку Горан Пандев и Енис Барди за освојување на планираните три бода.
Прво во 14-тата минута Елиф Елмас одлично го пронајде Пандев во казнениот простор, а ветеранот искусно ја искористи укажаната шанса отворајќи го резултатот. Само три минути подоцна Барди налета на една одбиена топка и со силен удар од работ на шестнаесетникот зголеми на 2:0.
Домашната репрезентација на Латвија само покажа зошто е убедливо последна на табелата без ниту еден освоен бод. Во текот на целиот натпревар речиси и да не направи сериозна шанса освен еден добар удар од далечина кој за малку заврши над пречката. На спротивната страна избраниците на селекторот Ангеловски во неколку наврати промашија добри прилики за поубедлива победа, како оние на Пандев, Тричковски, Елмас и Трајковски.
Во другите натпревари од нашата група фаворитите Полска и Австрија одиграа без голови, додека Словенија оствари важна победа од 3:2 над Израел.
Квалификациите продолжуваат во октомври кога најпрво на 10-ти Словенија ни гостува во Скопје, а три дена подоцна Македонија патува за Полска.
Табела:
Полска 13
Словенија 11
Австрија 10
Израел 8
Македонија 8
Латвија 0