Македонија и Грузија одиграа ново реми и тоа со ист резултат како и во Тбилиси во септември.
Македонскиот селектор Игор Ангеловски натпреварот го почна со стандардниот голман Столе Димитриевски; во одбраната триото Кире Ристевски, Дарко Велковски и Ѓоко Зајков; по страничните позиции Џани Алиоски лево и Стефан Ристовски десно; во средниот ред Бобан Николов и Тихомир Костадинов; додека во нападот триото Горан Пандев, Иван Тричковски и најистурениот Илија Несторовски.
Првиот дел мина во надмудрување на средината на теренот. Шанси скоро и да не видовме во првите 45 минути, а двајцата голмани останаа без ниту една интервенција. Проблеми за грузискиот селектор имаше по само 7 минута откако напаѓачот Китаишвили се повреди и мораше да биде заменет.
Првиот обид дојде дури во 33. минута кога по едно нафрлување на Алиоски, Нестороски ја спушти топката до Пандев кој од работ на шестнаесетникот упати удар, но беше блокиран и топката заврши во корнер.
Кон крајот на полувремето Македонија имаше два обида по корнер. При првиот ударот на Велковски со глава беше блокиран за нов корнер по кој Пандев, исто со глава, за малку биеше крај левиот дирек.
Останува фактот дека во првите 45 минути и двете репрезентации ниту еднаш не ја погодија рамката од противничкиот гол. Останува да го поправат впечатокот после паузата.
По петнаесетминутаната пауза, двете репрезентации заиграа далеку поактивно и поотворено.
Првата сериозна шанса ја имаа гостите три минути по паузата. Едно нафрлување од десно непланирано отиде в гол, но Димитриевски одлично интервенираше. На одбиената топка налета Даушвили кој упати силен удар, но нашиот голман уште еднаш се покажа на дело,.
Во 54. минута Николов упати една бомба од дваесетина метри, но Лорија беше на место.
Македонија остана со играч помалку во 67. минута откако по една гостинска контра Димитриевски истрча да ја расчисти опасноста, несмасно играше со рака и заработи директен црвен картон. Тоа направи дополнителни проблеми за Ангеловски кој за да стави нов голман мораше да извади играч, а изборот падна на Несторовски, додека меѓу стативите застана Шишковски.
Во 73. минута гостите дојдоа речиси до водство кога Катчарава ја погоди стативата. Сепак, водството стигна веќе во наредната минута кога Кварацхелија се проби во нашиот шестнаесетник, измести двајца македонски играчи и со силен удар ја затресе мрежата на нововлезениот Шишковски.
Во судиското надополнување Македонија доби удар од белата точка откако Зајков беше фаулиран во казнениот простор. Одговорноста ја презеде Алиоски кој успешно погоди израмнувајќи на 1:1.
И другиот натпревар од нашата група заврши со истиот резултат, а играа Естонија и Ерменија. Со тоа, нема промени на табелата и по ова 4. коло.
Следниот натпревар на Македонија е повторно против Грузија, но овој пат во финалниот бараж за пласман на ЕУРО, а ќе се игра на 12 ноември.