Ако не со квалитет, тогаш со глупост можеме да го обиколиме светот. Од синоќа инсерт од македонското фудбалско првенство се врти по интернет ширум светот предизвикувајќи исмевање.
Синоќа се комплетираше 20. коло во првата лига каде се сретнаа и минатогодишните финалисти од Купот на Македонија, екипите на Македонија ЃП и Академија Пандев.
Во 65. минута од натпреварот се случи една несекојдневна ситуација. Гостинскиот дефанзивец Стефан Костов, кој во тој момент беше можеби најдобар на теренот, направи таква глупост која и ден по натпреварот не можеме да си ја објасниме.
По еден аут, домашниот напаѓач Ален Јашароски одише во напад, а Костов со друга топка во рацете го бркаше и кога го стигна со неговата топка удри во топката која ја водеше Јашароски.
Костов за потегот заработи директен дрвен картон од судијата Благојче Ралевски, кој, пак, всушност на овој натпревар беше четврти судија, но откако главниот Марјан Маркоски се повреди мораше да го замени. Таа замена се случи неколку минути пред шоуто на Костов.
Иако потегот е навистина глупав и за секоја осуда, сепак и судијата погреши бидејќи требаше да покаже само жолт картон.
Видеото од дешавката стана вирално на Facebook и Twitter каде цел свет нѐ исмева. Нормално, заврши и на Seoski fudbal каде нашата лига ја условуваат како „прототип за селски фудбал“.