Филмот „Сестри“ во режија на Дина Дума е национален кандидат на Република Северна Македонија за наградата „Оскар за најдобар долгометражен интернационален филм” за 2022 година.
Филмот, режисерско деби на Дума, е приказна за две тинејџерки чие пријателство е ставено на тест кога се соочени со последиците од нивното декадентно однесување. Главните улоги ги играат Антонија Белазелкоска и Миа Жиро.
Како што соопштија од Друштвото на филмските работници на Македонија, одлуката е донесена од страна на Комисијата за избор на македонски кандидат за оваа награда, составена од Дејан Димески – кинематографери претседател на Комисијата, Роберт Јанкуловски – фотограф и кинематографер, Петар Богоевски – дизајнер на светло, Несрин Таир – актерка, Снежана Поњевиќ-Муча – сценографка, Александар Пејовски – композитори, Дритон Вејсели – актер, а прифатена и одобрена од Американската академија за филм, уметност и наука.
Македонската фестивалска премиера беше на фестивалот за филмска камера „Браќа Манаки“ во Битола. Според правилата на Академијата, националниот кандидат за Оскар треба да има кино-премиера во периодот од 1 јануари до 31 декември 2021.
Прелиминарната листа од 15 финалисти за номинација за Оскар ќе биде објавена на 21 декември, од кои на 8 февруари 2022 ќе се изберат 5 номинирани филмови.
94. доделување на Оскарите ќе се одржи на 27 март 2022 година, во Лос Анџелес.