Македонската фудбалска репрезентација за играчи до 21 година се враќа од Казахстан со голема победа и важни 3 бода во борбата за пласман на ЕУРО 2021.
Казахстан ни откина планирани 3 бода во Скопје лани во октомври кога одигравме 1:1. Сега, на гостински терен во најголемиот кахастански град Алмати и поранешна престолнина, младите македонски фудбалери се одмаздија и ги освоија трите бода со кои остануваат во борбата за 2. место.
Селекторот Благоја Милевски натпреварот го почна со Ристо Јанков на голот, Филип Антовски, Агрон Руфати (к), Есмин Личина и Тодор Тодороски во одбраната, Јани Атанасов, Давор Здравковски и Ердон Даци во средината, а Дарко Чурлинов, Марко Ѓорѓиевски и Димитар Митровски во офанзивата.
Во 38. минута конечно македонските надежи го скршија казахстанскиот отпор. Чурлинов исфрли двајца противнички играчи и со една бомба од дваесетина местри ја затресе домашната мрежа.
Само три минути подоцна Македонија го дуплираше водството. Талгат Кусјапов го фаулираше Митровски во казнениот простор и главниот судија покажа на белата точка. Одговорноста ја презема Атанасов, но неговиот удар успешно го прочита и одбрани голманот Мухаммеџан Сеисен. Сепак, на одбиената топка прв налета токму Атанасов кој од втората шанса не промаши и зголеми на 0:2.
Само што почна вториот дел, односно во третата минута по паузата, Атанасов го проигра Чурлинов, а овој по вторпат ја затресе мрежата на Сеисен за веќе навидум сигурно водство од 0:3.
Но, четири минути подоцна Казахстанците успеаја да ја вратат надежта откако Оралхан Омиртајев погоди за 1:3. Малку фалеше Македонија да направи од готово вересија откако во 55. минута домаќинот доби пенал по туркањето на капитенот Руфати врз Омиртајев. За среќа, Јанков го одбрани ударот на Артур Шушеначев, а Омиртајев налета на одбиената топка и ја смести во мрежата, но судијата го поништи голот бидејќи Казахстанецот прерано влетал во шестнаесетникот. Омиртајев протестираше, а тоа резултираше во негов втор жолт картон и исклучување.
Во 67. минута Чурлинов му асистираше на Митровски за водство од 1:4 и запечатување на победата. Дека домаќините нема повеќе што да бараат на овој натпревар покажа и директниот црвен картон за Рауан Орјнбасар по несмасниот старт врз Чурлинов по што Казахстан остана со само 9 фудбалери.
Македонија сега има 13 бодови од 7 натпревари и се зацврсти на 2. место, зад лидерот Шпанија која има 16 од 6 натпревари и која денеска од 18:45 игра на гости со Фарски Острови. Од 18 часот играат уште и Црна Гора - Израел
