Денеска во Нион тројцата македонски учесници во квалификациите за новата сезона од Лига Европа ги добија своите противници, сите до еден кавказки тимови.
Третопласираната од минатата сезона, тетовска Шкендија, европската авантура ќе ја почне од Азербејџан откако за противник го доби Сумгај'т Ситу од третиот по големина град во таа земја, Сумгај'т.
Четвртопласираната Ренова беше извлечена да игра против ерменски Алашкерт, додека петтопласираниот Шкупи го доби Нефтчи од главниот азербејџански град Баку.
Нефтчи - Шкупи
Алашкерт - Ренова
Сумгај'т Сити - Шкендија
Сите три македонски екипи беа извлечени да играат како гости во државите од Кавказот. Според новите правила, поради пандемијата со коронавирусот, нема да се игра по принципот дома-гости туку еден натпревар на теренот на екипата која ќе биде извлечена прва во жрепката, или на неутрален терен доколку во земјата домаќин ситуацијата со пандемијата е влошена.
Натпреварите ќе се играат на 27 август. Доколку по 90 минути игра резултатот е нерешен, ќе следуваат два пати по 15 минути, а доколку победник сѐ уште нема, тогаш ќе се изведуваат пенали.
