Македонските туристички агенции ги откажуваат турите во Италија поради корона вирусот

Епидемијата со корона вирусот Covid-19 се шири низ Европа, а најсериозна е ситуацијата во Италија каде за неколку дена бројот на заразени порасна на 283, а седум лица починаа.

Владата денеска на седница донесе одлука да ги задолжи сите основни и средни училишта, како и сите универзитети да ги одложат сите предвидени патувања и екскурзии во Италија, како и да организира едукативни часови за превенција од корона вирусот, во соработка со локалната самоуправа и центрите за јавно здравје. На граѓаните на земјата им се препорачува не патуваат во Италија и во другите земји каде што е регистрирано поголемо присуство на корона вирусот.

По ваквиот развој на настаните, туристичките агенции во земјава почнаа со откажување на планираните тури во Италија, како причина наведувајќи го „моралниот аспект“ и „безбедноста на патниците“.

„Будно ја следиме ситуацијата со ширењето на корона вирусот Covid-19 во Италија. Од морален аспект, но и поради загриженост и општа безбедност одлучивме да ги откажеме патувањата за 8 Март во Италија. Безбедноста и здравјето на нашите патници и сограѓани ни е на прво место! Воедно сакаме да ве информираме дека сите кои имаат уплатено аранжман за 8 Март во Италија може да се префрлат на некоја од останатите тури или во спротивно средствата во целост ќе бидат вратени“, гласи соопштението на туристичката агенција „Нехар Травел“ објавено на Facebook.

„Ве известуваме дека сите патувања за 8 Март поради корона вирусот Covid-19 во Италија ќе бидат откажани од наша страна, поради безбедноста на нашите патници која секогаш ни е на прво место. Големиот број на патници кои имаа уплатено за овие дестинации можат да ги добијат во целост сите уплатени средства или пак да се префрлат на некое друго патување за друг термин. Ви благодариме на разбирањето и на довербата“, соопшти туристичката агенција „Фалкон Травел“.