Францускиот претседател Емануел Макрон рече дека екстремно десничарската партија Национален собир (RN) и левичарската коалиција Нов народен фронт, и двете фаворити на парламентарните избори на 30 јуни и 7 јули, ризикуваат да ја втурнат Франција во граѓанска војна.
Макрон за подкастот Generation Do It Yourself изјави дека манифестот на екстремно десничарската RN, предводена од Марин Ле Пен и новата млада ѕвезда Џордан Бардел, се заснова на „стигматизација или поделба“.
„Мислам дека решенијата што ги дава екстремната десница не доаѓаат предвид, бидејќи тие ги категоризираат луѓето во однос на нивната религија или потекло и затоа водат до поделби и граѓанска војна“, рече Макрон.
Истата критика Макрон ја упати и кон екстремно левичарската „Франција непокорена“ (LFI), која е дел од пошироката левичарска коалиција „Нов народен фронт“.
„Зад тоа стои граѓанска војна затоа што вие исклучиво ги категоризирате луѓето според нивните религиозни ставови или заедницата на која припаѓаат, што некако ја оправдува изолацијата од пошироката национална заедница, а во овој случај би имале граѓанска војна со оние кои не ги делат истите тие вредности“, рече Макрон.
Запрашан да одговори на коментарите на Макрон, претседателот на RN Џордан Бардела, кој се смета дека ќе биде нов премиер доколку RN освои најмногу гласови на изборите, му одговори на Макрон велејќи дека претседателот „не треба да го зборува тоа“.
Лидерот на LFI, Жан-Лук Меланшон, исто така, ги осуди коментарите на Макрон во интервју за France 2 TV, велејќи дека политиката на Макрон довела до граѓански немири, како на пример во француската прекуморска територија Нова Каледонија.
Коментарите на Макрон дојдоа неколку часа откако RN го објави својот изборен манифест, кој ветува ограничување на имиграцијата и ставање крај на правата на државјанство за децата родени и израснати во Франција од странски родители.
На промоцијата на манифестот во Париз, Бардела рече дека долгорочен приоритет на партијата е „да ја врати Франција на нозе“ со воведување „неопходна легислатива против исламистичките идеологии“. Детали за овој план не беа дадени.
