Францускиот претседател Емануел Макрон предупреди дека Европејците не може да бидат заштитени без „вистинска, европска армија“, на одбележувањето на Примирјето за Првата светска војна.
За време на посетата на некогашниот Западен фронт во Вердун, тој рече дека Русија покажала дека може да биде закана и дека Европа мора да биде способна „сама да се одбрани“.
Макрон и претходно има предлагано да се формираат заедички воени сили за интервенирање во кризни мисии.
Германската канцеларка Ангела Меркел ја поддржа идејата за интервенциски сили во јуни, но рече дека тоа би морало да биде дел од „структурата на одбранбената соработка“.
Велика Британија се согласува со идејата за заеднички сили, но се противи на европска армија поради ризикот да се создаде паралелна струкура со НАТО.
Макрон веќе предупреди дека Европејците веќе не може да се потпираат само на САД за одбрана и ја оживеа темата денеска како одговор на одлуката на американскиот претседател Доналд Трамп да се повлече од нуклеарниот договор со Русија од 1987 година.
„Мора да се заштитиме во однос на Кина, Русија, па дури и од САД“, изјави тој за француското радио Europe 1.
„Кој е главната жртва? Европа и нејзината безбедност. Сакам да изградам вистински безбедносен дијалог со Русија, земја која ја почитувам, европска земја – но мора да имаме Европа која може сама да се одбрани без да се потпира само на САД“, рече Макрон.