Францускиот претседател Емануел Макрон денеска ја заврши дводневната посета на Србија, која беше одбележана со договорот за набавка на 12 нови борбени авиони Rafale и пораката на Макрон дека го поддржува Белград на патот кон Брисел и наклонетоста на Париз кон проектот за рударење ретки суровини во Србија.
Во четвртокот, на првиот ден од посетата на Макрон, Србија потпиша договор со Франција за купување на 12 нови борбени авиони Rafale во вредност од 2,7 милијарди евра.
Договорот, потпишан од српскиот министер за одбрана Братислав Гашиќ и извршниот директор на Dassault Aviation, Ерик Трапие, вклучува логистички пакет, резервни мотори и делови за овие повеќенаменски авиони.
Макрон оцени дека купувањето на Rafale е „јасен избор што ја претставува волјата за долгорочен сојуз меѓу двете земји во рамките на силна, суверена Европска Унија“.
Тој рече дека Србија припаѓа во Европската Унија и дека на Унијата „ѝ треба силна Србија“, а Србија има потреба од „силна и суверена ЕУ за да ги брани своите интереси“.
Посетата на шефот на француската држава беше придружена со потпишување на вкупно 12 меѓудржавни договори.
Зборувајќи за дијалогот меѓу Србија и Косово, Макрон повтори дека нормализацијата на односите меѓу Белград и Приштина е дел од приближувањето кон ЕУ и дека не може да има компромис без храбри одлуки од двете страни.
Белградските медиуми јавуваат дека Вучиќ пеел косовски песни на приемот за претседателот Макрон во вилата Мир во Белград во четвртокот навечер.
Директорот на Канцеларијата за јавна и културна дипломатија, Арно Гијон, рече дека за него „било важен момент кога претседателот Вучиќ го зел микрофонот и во пријателска атмосфера испеал косовски песни“.
„Беше многу емотивно и остави впечаток на сите нас. Не само на нашиот народ, туку и на претседателот Макрон и француската делегација“, рече Гион.
