Деветгодишниот Лорен Симонс од Белгија се подготвува да дипломира во декември, а после тоа планира да се посвети на изучување на медицината.
На прв поглед, Лорен Симонс изгледа како и секое друго деветгодишно дете. Но, кога ќе почне да зборува за неговата работа на Универзитетот во Холандија, ги подзамислува сите возрасни. Тој работи заедно со тим истражувачи со кои развива компјутерско коло кое ќе реплицира дел од мозокот, пишува Washington Post.
„Во лабораторијата се обидуваме да ги поврземе невроните за да можеме да ги следиме реакциите на лековите во определен дел од мозокот“, раскажува детето, објаснувајќи го проектот во кој се комбинираат знаењата од биомедицината и електротехниката.
Ова чудо од дете е на пат да стане најмладиот човек во светот со факултетска диплома. Тоа ќе се случи доколку Лорен наредниот месец ги положи сите испити на отсекот за електротехника на Универзитетот во Ајндховен.
„Планирам да запишам студии по медицина. Но претходно ќе се одморам убаво“, вели тој.
Лорен е роден во Белгија, но живее во Холандија. Средното училиште го завршил за една година, а тригодишните студии ќе ги заврши за само девет месеци.
Сите професори се воодушевени што имаат студент како Лорен, а за секој од нив ова е уникатна и можеби неповторлива ситуација затоа што го имаат најмалиот студент.
Кога не е факултет, Лорен го шета неговото куче, игра видеоигри и објавува фотографии на Instagram.
Инспириран од Никола Тесла, тој планира да го истражува полето на вештачките органи и да направи вештачко тело во неговата лабораторија.
„Баба ми и дедо ми имаат срцеви проблеми“, ја објаснува Лорен неговата одлука.
Постојано му пристигнуваат понуди за студирање од најпрестижните универзитети во светот. Засега, САД е неговата опција, а родителите му се најголемата поддршка за да ја донесе правилната одлука.