Паоло Малдини планирал револуција во Милан пред да биде разрешен, а главната промена му била смена на тренерот Стефано Пиоли со Андреа Пирло.
Легендарниот поранешен играч на Милан и на Италија, сега 54-годишниот Малдини, во понеделникот беше разрешен од функцијата технички директор на клубот од страна на сопственикот Џери Кардинале, по краток, но тензичен состанок. Подоцна и на неговиот близок соработник Фредерик Масара му беше покажана излезната врата од клубот, со што се стави крај на една важна ера кај „Росонерите“.
Малдини и Масара играа важна улога во враќањето на Милан во врвот на италијанскиот фудбал, носејќи важни играчи како Мајк Мењан, Рафаел Леау и Тео Ернандес. Заминувањето на дуото сега го фрла клубот во хаос и создаде тензија помеѓу играчите, кои особено го почитуваа Малдини.
Како што пренесува Corriere dello Sport, извори од таборот на Милан велат дека Малдини сакал да направи промена на тренерската палка заменувајќи го Стефано Пиоли со неговиот поранешен соиграч Андреа Пирло, кој неодамна ја напушти клупата на турски Фатих Караѓумрук.
Разрешувањето на Малдини ја закопа идејата за тренерска смена, па сега Пиоли се смета за централен дел на проектот на RedBird за тимот од Милано.