Голманот на Вегас Голден Најтс ја исполни желбата на едно момче во публиката кое на својот роденден дојде да го бодри својот омилен тим.
„Флауер, роденден ми е. Може ли да направиш селфи со мене?“, пишуваше на пораката кое момчето ја држеше за време на натпреварот помеѓу Сент Луис Блуз и Вегас Голден Најтс.
Пораката се однесува на Марк-Андре Флори, голманот на тимот од Лас Вегас чиј надимак е „Флауер“ (Flower, односно „Цвет“). 35-годишниот канадски голман важи за еден од најдобрите во НХЛ, а за „Златните витези“ брани веќе трета сезона откако направи трансфер од Питсбург Пенгуинс каде мина цели 12 сезони.
Флори ја исполни желбата на славеникот давајќи му роденден кој вечно ќе го памети, а детето потоа се пофали со селфито.
За жал неговиот омилен тим не победи бидејќи домашните хокеари на Сент Луис славеа со 4:2 и тоа со пресврт во втората третина откако првата ја загубија со 1:2. Сите четири гола ги прими токму Флори.
