Големо разочарување владее во таборот на македонската ракометна репрезентација по вчерашниот висок пораз од Холандија во второто коло на Светското првенство 2023.
Еден од најискусните, левото крило Дејан Манасков, смета дека оваа селекција во дадениов момент нема квалитет за вакви тешки натпревари.
– Не знам што да кажам. И пред натпреварот реков дека ако играме како со Норвешка ќе изгубиме 10 разлика. Одигравме катастрофално. Немаме квалитет за вакви натпревари. Вакви натпревари се играат со концентрација, со глава, со срце, со изгубени глави не се игра на вакви натпревари. Ќе се обидеме да собереме сили да ја победиме Аргентина, колку да се рече дека сме влегле во втората фаза, па таму со Господ напред, изјави Манасков.
Во последното коло од Ф групата македонската репрезентација ќе се соочи со Аргентина во директен дуел за пласман во главната групна фаза. Во случај на пораз, ракометарите нема да си дојдат дома бидејќи ќе разигруваат за пласман во Президентс купот заедно со останатите последнопласирани во осумте групи. Таму место веќе обезбедија Уругвај и Алжир.
